上一則 【蝸居百科】愈拋棄 愈歡喜
下一則 【蝸居百科】揀衣櫃咪話唔煩
0
0

【蝸居百科】中產生活:飲咖啡

【now.com地產】相信好多人同我一樣,朝早起身,唔整杯香濃咖啡,頭腦就唔會清醒。所以,好多蝸居,都必備一部咖啡機。而最普遍,要數滴漏式(drip brewing)咖啡機。

滴漏式咖啡機喺一種簡單方便嘅咖啡機,只要打開機頂水箱蓋,倒入新鮮凍水,然後攞出過濾漏斗,將過濾紙盤放入斗內,再將適量嘅咖啡粉倒入濾紙盤,放返漏斗入機內,就可以開機煮咖啡。

跟住,就會有大約攝氏90度之間嘅熱水會自動滴入漏斗內,穿透咖啡粉,再滴落咖啡壺裡面。機底有暖盤,會為壺中嘅咖啡保持溫度,十分方便。

如果用水喉水來煮咖啡,最好先將水過濾,除去水中嘅雜質同氣味,以免影響咖啡嘅香氣同味道。

咖啡一旦煮好,就唔可以再加熱;再加熱,味道就會變。所以,每次煮時,只需要煮想要飲用嘅分量,一煮好,10分鐘內就要將咖啡飲完,咁就最識飲咖啡。

標準嘅份量喺兩平茶匙(約15克)嘅咖啡粉煮一杯(約180cc)咖啡,而個人喜歡嘅濃度可以按照依個份量加減。

最後,要保持咖啡機清潔乾淨,咁就可以保證每壺咖啡都香濃新鮮,醒腦提神。

蝸居達人邵存希