上一則 【蝸居百科】長者浴室安全指南
下一則 【蝸居百科】濾水器保障健康
0
0

【蝸居百科】小心一地水銀

【now.com地產】慳電膽已經成為蝸居照明主流。慳電膽好處多,比鎢絲燈膽慳電四、五倍,壽命長幾倍,發光時溫度低,可以節省冷氣電費。雖然售價比較貴,但係整間蝸居全用慳電膽,貴買平用,長遠計都係抵!

但係,慳電膽有一個致命缺點,就係裡面有水銀。一旦打爛咗慳電膽,如果處理不善,就會危害健康。

德國某個研究指出,使用中嘅慳電膽一旦打爛咗,釋放出來嘅水銀,留地板上面五個鐘頭之後,仍然係安全標準嘅20倍!

如果一旦打爛咗慳電膽,水銀瀉地,你要點做?

一:立刻叫細路仔、大肚婆同埋你啲貓貓狗狗盡快走開。

二:立刻打開窗口通風15分鐘;你都要行開,等水銀氣體散走,先至返去事發現場清理。

三:戴上膠手套,用硬紙皮小心鏟起玻璃碎片,放入密封嘅容器裡面,或者用幾層報紙包好,外面寫上「水銀玻璃,小心!」嘅字條。千祈唔好用吸塵機吸走玻璃碎片,因為使用吸塵機會令到水銀揮發,增加吸入氣化水銀嘅風險。

四:用濕毛巾抹淨地方。戴埋過嘅手套同毛巾,就放入膠袋,封好口就丟掉。

五:緊記,事後洗手。

六:清理後,窗口要持續打開最少24小時。

祝君平安。

蝸居達人邵存希