上一則 【蝸居百科】涼冷氣惹出病
下一則 【蝸居百科】抽濕機又出事
0
0

【蝸居百科】慎防電風扇失火

【now.com地產】話口未完,前幾日八號風球高掛下,喺土瓜灣一個屋苑單位裡面,半夜又有抽濕機失火,一家五口險葬火海,約200名住客疏散。

其實,除咗抽濕機,電風扇亦都係相當惹火。曾經發生過座檯式電風扇跌喺地上,產生火花燒著毛氈,釀成火災;又試過有人將掛牆扇掛近窗口,大雨時雨水飛入風扇,令到風扇著火。

所以,大家唔好以為電風扇係好平常簡單嘅電器,就掉以輕心。以下係一啲使用電風扇嘅守則:

一:風扇要放喺平穩嘅地方,防止風扇跌倒;

二:風扇四圍要有足夠嘅空間俾風扇擺動同散熱;

三:唔好比紙張、衣物等捲入扇葉阻著運轉,或者封著摩打散熱罩,產生過熱,引起火警;

四:摩打積塵,就會阻礙散熱。喺高熱情況下,積塵就容易著火。所以,一定要時常清除積塵;

五:最好唔好連續開動風扇超過10小時以上,避免摩打運轉太耐,產生高熱;

六:最後,最好唔好喺內地買風扇,因為嗰啲風扇嘅外殼同電線嘅用料可能唔符合香港嘅規格。絕緣可能唔夠強,容易漏電;外榖嘅塑膠防火能力可能又唔夠,著火反而易燃。

蝸居達人邵存希