下一則 【樓宇法律】簽錯合約搭錯船
0
0

【樓宇法律】消防新例莫輕視

【now.com地產】今個月頭,屋宇署首宗根據《消防安全(建築物)條例(Fire Safety (Buildings) Ordinance)》成功檢控旺角一幢大廈嘅業主立案法團,因為法團無遵從根據法例發出嘅消防安全令,被法庭判罰款15,000蚊。

依條法例喺係2007年7月1日先至生效,主要作用係要改善樓齡30年以上(即1987年3月1日或之前落成)嘅綜合同埋住宅樓宇嘅消防設施。

屋宇署同消防處可以向物業擁有人或者佔用人發出消防安全指示,要求喺指定時間內改善樓宇用作非住用途嘅部分裡面,如自動灑水系統、緊急照明、樓宇耐火結構等嘅消防裝置。

到2016年1月底,消防處總共提出咗189宗檢控,牽涉44幢樓宇,其中27幢無成立法團。而屋宇署就提出咗128宗檢控,牽涉21幢樓宇,當中六幢無成立法團。

法例用意本來好,但係對嗰啲「三無」(即係無法團、無居民組識同埋無聘請物業管理公司)嘅大廈來講,居民對著安全令令,真係老鼠拉龜,唔知從何入手。

而家,消防處同埋屋宇署會將尚未成立法團嘅目標樓宇名單,交畀民政署。民政署就透過「大廈管理專業顧問服務計劃」,聘請專業嘅物業管理公司,為樓宇提供一站式專業支援服務,協助成立法團,又提供維修資助,使到大廈能夠最終有能力遵照指示改善消防設施。

香港測量師學會會員陳家欣