上一則 【樓宇法律】買者自慎
下一則 【樓宇法律】幫好?唔好幫?
0
0

【樓宇法律】架車被停車場閘杆打中係「獨立嘅干預事件」

【now.com地產】揸車嘅你,千算萬算總應未算過被進出停車場前嗰支閘杆打中架車呢?當然有人試過啦,如果唔係咩叫做意外呀,睇吓以下呢個例子先啦。

某日,事主饒先生揸車駛入屯門某屋邨商場嘅停車場,但係就喺架車進場途中,被入口閘杆降落所打中,於是饒先生入稟法庭,向管業公司索償。

管業公司解釋,停車場入口閘杆位置前後嘅地底,埋藏咗兩個地底線圈,可以感應導磁性物體。汽車駛到閘杆前第一個線圈上面,司機拍八達通,系統就會指示閘杆上升;然後,司機通過閘杆,駛過第二個線圈上面離開之後,系統就會指示閘杆回落。

但係,跟據閉路電視嘅錄像,喺饒先生駛到第一個線圈,閘杆升起後,有一個人推着手推車,喺饒先生架車嘅旁邊行過,令到第二個線圈產生感應,引致閘杆回落,所以打中架車。

饒先生指管業公司應該知道會有由第三者巧合咁引發到意外嘅可能性,應該喺閘前張貼警告。

不過法庭認為手推車嘅出現,係一個獨立嘅干預事件,終斷咗管業公司嘅謹慎責任(duty of care)。

而根據「新介入行為(novus actus interveniens)」嘅法律原則,判管業公司無須向饒先生負責。

(法庭案件編號:HCSA 6/2014)

香港測量師學會會員陳家欣