上一則 【樓宇法律】兄妹爭產實錄
下一則 【樓宇法律】「入伙紙」釋疑
0
0

【樓宇法律】母子爭產實錄

【now.com地產】唔好以為豪門望族,先至會有母子爭產嘅事發生;其實講到土地收益,兩母子都會反目成仇,爭到去法庭。一齊睇睇以下個案*:

話說某人去世,留低兩幅位新界土地,畀佢當時只有12歲嘅仔仔;但由於阿仔尚未成年,於是阿媽就獲委任成為佢嘅受託人。之後,政府要收回嗰兩幅土地,並且支付收地賠償。

阿媽話,收地賠償係受制於中國法律同埋習慣,規定阿仔須要供養阿媽直到百年歸老為止,同時要向阿媽所生嘅兩個未嫁女提供嫁妝。阿仔告阿媽上法庭,要求阿媽將啲收地賠償畀返佢。

法官裁定,法庭無權將中國法律同埋習慣運用到新界土地嘅收地賠償嘅事上面,於是判阿仔得直。阿媽唔服,提出上訴;但係上訴失敗。

上訴庭認為,要使法庭具有司法管轄權,阿媽須要證明案件係受《新界條例》第13(1)條所涵蓋:「……喺原訟法庭或區域法院所進行嘅任何有關新界土地嘅法律程序中,法庭有權認可並執行任何影響新界土地嘅中國習俗或傳統權益。」但係,嗰條法例第2條所定義嘅「土地」,並非指收地賠償或賣地收益。阿媽未能克服嗰條法定定義,所以唔能夠引用中國法律同埋習慣來打依單官參司。

香港測量師學會會員陳家欣

*法庭案件編號:CACV 146/2014