上一則 【城規建設】新瓶舊酒話棕地
下一則 【城規建設】大眾踩單車城市內
0
0

【城規建設】Informationization

【now.com地產】喺一個資訊科技嘅年代,各個專營巴士公司已經逐步引入實時到站資訊系統,相信大家都下載咗巴士公司嘅到站資訊應用程式,亦見過好多巴士站安裝咗到站資訊屏幕,同埋巴士裡面各站到達時間同路線顯示屏。

喺巴士站安裝顯示屏,政府係以成本配對嘅形方式,巴士公司出一半,政府出一半來進行,以作鼓勵。

依家第一階段三年內,已經喺 550個有上蓋同埋電力供應嘅巴士站,安裝咗顯示屏;計劃喺未來幾年內,就可以覆蓋所有巴士路線。乘客唔單止可以喺手機預知巴士到站時間,亦都可以喺巴士站實地以最短嘅時間等待巴士到站,計劃行程就倍覺方便。

小巴又點呢?

城市大學最近亦同一啲運輸企業合作研發小巴資訊系統,喺12輛行走九龍同埋新界嘅公共專線小巴上面,安裝電子顯示屏,實時報導下一個站同埋終點站嘅方向,並且顯示附近主要嘅地標,大廈、商場或者公共設施等,幫助乘客唔使問司機,就可以清楚知道小巴所行到嘅位置,方便準確咁落車。

而系統亦會將小巴嘅行車數據傳送到車隊監控中心,令營運公司對每一架小巴嘅行動都瞭如指掌,並且可以預測到小巴駛到各站嘅時間,畀候車乘客可以透過手機應用程式,知道小巴預計嘅到站時間。

資訊世界,無遠弗屆。

香港測量師學會會員陳家欣